Kundërshtari i Ramiz Lladrovcit, Naim Bazaj, i cili ka synuar të kandidojë për PDK-në në Drenas, nuk po ia begenis fitoren pa balotazh kryetarit aktual. Dikur Bazaj kundërshtonte haptazi kandidaturën e Lladrovcit duke thënë se Ramizi nuk ka shanse pasi mezi kishte fituar në vitin 2016 në zgjedhjet e jashtëzakonshme. E tani që Ramiz Lladrovci e demantoi, Bazaj thotë se fitorja erdhi pasi Lladrovci bëri marrëveshje të fshehtë me parti tjera.
Partia Demokratike e Kosovës përsëri po përballet me përçarje ndërmjet kolegëve partiakë, në bastionin e saj në Drenas. Kryesuesi i Kuvendit Komunal të Drenasit, Naim Bazaj po pretendon se fitorja e Ramiz Lladrovcit në këtë komunë ka ardhur pas një marrëveshjeje interne ndërmjet partive tjera. Bazaj është i bindur qind për qind për marrëveshjen e cila e nxori fitues Ramiz Lladrovcin, në garën për Drenasin. Ai përmend intervenime që, sipas tij i ndihmuan Lladrovcit të fitojë edhe një mandat pa balotazh.
“Me thënë drejt unë nuk deshta mu prononcu rreth kësaj po dihen qysh e tek, shumica e anëtarëve tjerë mos të thom prej partive tjera kishin pas një marrëveshje interne… Shumica e tyre kishin pas një farë marrëveshje, intervenime etj.”- tha Bazaj nëpërmjet telefonit për Gazetën Express.
“Po 100% mund të them ashtu që ka qenë një marrëveshje të cilën e kemi dëgju”- shprehet i bindur Bazaj.
Vetë Bazaj gjatë fushatës e ka konfirmuar se vëllai i tij ishte arrestuar ditë më parë si i dyshuar për kanosjen ndaj kryetarit të Drenasit, Ramiz Lladrovci duke u mbajtur edhe 48 orë në paraburgim, por ai thotë se nuk ka bërë fushatë të egër kundër Lladrovcit. Thotë se mendimi i tij ka qenë që ai të mos përkrahet.
“Pra unë nuk kam bërë fushatë të egër, thjesht mendimi jem ka qenë ai që më dëgjon të mos e përkrahë. Unë në dy vendtakime kam qenë, të vogla në pjesën teme, aty edhe me thanë të drejtën interesimi ka qenë që mos me mbështet, nuk do të thotë i shumicës. Po fushatë s’kemi bërë”, tha Bazaj të enjten për Express.
Tutje ai tha se pasi të përfundojë raundi i dytë i zgjedhjeve për komunat të cilat kanë mbetur në balotazh, do të dalë me një qëndrim se a do të vazhdojë të mbesë pjesë e PDK-së apo do të largohet përfundimisht.
“Pas balotazhit besoj që do të dalë me një qëndrim timin a jam në PDK a s’jam, për momentin tash jam anëtar i kryesisë, por skam dashur me mbështet as me përkrah personin në fjalë”, përfundoi ai.
PDK u përball me një situatë të vështirë kur Bazaj vendosi të garojë si kandidat i pavarur në zgjedhjet e jashtëzakonshme që u mbajtën në dhjetor të 2016 në Drenas, por pas negociatave me partinë kishte vendosur të tërhiqet nga kandidatura e tij.
Në zgjedhjet e 2016-s fitoi Ramiz Lladrovci nga balotazhi, ndërsa në zgjedhjet e së dielës PDK-ja e fitoi komunën e vetme pa balotazh, Drenasin. Lladrovci mori 59.72% të votave. /Gazeta Express
