Moderatorja e njohur Blerta Foniqi Kabashi, ka reaguar publikisht ndaj një vendimi të menaxhmentit të RTK-së, të cilin e konsideron arbitrar dhe joligjor.
Në reagimin e saj thuhet se të premten, në fund të orarit të punës, ajo së bashku me kolegët e saj kanë marrë një njoftim të paparalajmëruar, me të cilin përjashtohen nga moderimi i emisioneve – përkatësisht i magazinës së orës 17:00 dhe lajmeve të orës 23:00.
Ajo thekson se kanë kërkuar takim me menaxhmentin e RTK-së lidhur me këtë çështje, por nuk kanë marrë përgjigje. Ajo e quanë vendimin si ndërhyrje të drejtpërdrejtë në skemën programore, që sipas saj është e paligjshme, ngase ndryshimet në skemë mund të bëhen vetëm nga Bordi – institucion i cili aktualisht mungon në RTK.
Ndryshe moderatorja Blerta Foniqi-Kabashi, kishte intervistuar një muaj më parë deputetën e LVV-së, Fitore Pacolli, ku kjo e fundit edhe kishte pasur një përplasje me gazetaren pasi nuk i kishin pëlqyer pyetjet drejtuar rreth vëllaut dhe dajës së saj.
Po ashtu moderatorët e përjashtuar pohojnë se janë përballur me presion të vazhdueshëm dhe akuza të pabaza nga eprorët, gjë që e ka bërë të vështirë ushtrimin e detyrave të tyre të punës.
Ndryshe ata paralajmëruan se do të ndjekin të gjitha rrugët ligjore për mbrojtjen e të drejtave të tyre, duke nënvizuar se do të vazhdojnë punën në mënyrë objektive dhe profesionale, pavarësisht sfidave. /Lajmi.net/
