Ministri i Tregtisë, Endrit Shala, ka njoftuar se është marrë vendimi që të mbyllet festivali ‘’Beer and Wine Festival Prishtina’’ për shkak të shkeljeve të shumta që ka gjetur Inspektorati i kësaj ministrie.
Ai tha se në këto momente ky institucion ka marrë vendimin, njofton Klan Kosova.
Në këtë festival janë lejuar të hyjnë edhe persona të moshës nën 18 vjeç, të cilët kanë konsumuar pije alkoolike.
Shala tha se pas shumë ankesave ka dalë edhe vetë të inspektojë këto shkelje.
Ja postimi i tij i plotë:
Pas ankesave të shumta nga qytetarët dhe për shkak të shkeljeve të evidentuara respektivisht lejimit të hyrjes dhe konsumimit të pijeve alkoolike nga persona të mitur nën moshën 18 vjeç, kam urdhëruar inspektoratin e tregut të MTI-së që të bëjë inspektim të jashtëzakonshëm në këtë organizim dhe pas inspektimit dhe gjetjeve të bëra, Inspektorati i MTI në këto momente ka marrë vendim ta mbyllë aktivitetin ‘’Beer and Wine Festival Prishtina’’ që po mbahet në pllaton e Pallatit të Rinisë në Prishtinë!
