Milot Rashica nuk mundi të shkojë në Euro 2016, për shkak se trajneri Gianni de Biasi nuk e përfshiu në listën e 23 lojtarëve të Shqipërisë.
Megjithatë, talenti i cili luan me Vitessen në Holandë ka një të ardhme të shkëlqyer përpara dhe është i bindur se do të jetë protagonist në të ardhmen, edhe pse ende nuk e ka të qartë se me cilën kombëtare, pasi tashmë është edhe Kosova pjesë e FIFA-s.
Duke folur për holandezen “Voetbal International”, Rashica shpjegon situatën e tij dhe të lojtarëve kosovarë.
“Ka disa lojtarë në kombëtaren shqiptare që kanë lindur në Kosovë, ashtu si unë. Shqipëria e Kosova janë një, e kemi Shqipërinë në gjak, ashtu si gjithë populli në Kosovë, që ëndërron një ditë një kombëtare të bashkuar. Kur u kualifikuam, të gjithë vërshuan në rrugë, ishte një kulm në historinë e shqiptarëve, si në Shqipëri, ashtu edhe në Kosovë, ku njerëzit qanin nga gëzimi. Edhe Kosova është në Europian, falë Shqipërisë”.
Megjithatë, tema e së ardhmes së futbollistëve kosovarë nuk lë pa prekur edhe Rashicën: “Është një zgjedhje shumë e vështirë. Unë di vetëm që dua të jem në Kupën e Botës në Rusi. Vetëm se është ende çështja se me cilin vend”.