Në konferencën për rindërtimin e Ukrainës që po mbahet në Romë, kryeministrja italiane Giorgia Meloni ka akuzuar drejtëpërdrejt Rusinë për “rritjen e sulmeve” ndaj civilëve dhe infrastrukturës civile në Ukrainë.
Meloni tutje ka thënë se pjesëmarrja e lartë në këtë aktivitet – me më shumë se 70 përfaqësi kombëtare dhe mijëra kompani e përfaqësues të shoqërisë civile – “tregon… se çfarë lloj të ardhmeje dëshirojmë të gjithë së bashku për Ukrainën, dhe sa të bindur jemi se do ta arrijmë atë”.
“Duam të shohim përtej padrejtësisë së padurueshme që i është shkaktuar popullit ukrainas për më shumë se tre vjet. Dhe tani duhet të imagjinojmë një Ukrainë të rindërtuar, të lirë dhe të begatë,” është shprehur ajo.
Kryeministrja më tej ka shtuar se: “Detyra jonë është të ndihmojmë Ukrainën. Dhe do ta bëjmë, për të shkruar një kapitull të ri në historinë e saj”.
Ajo poashtu ka bërë të ditur se pjesëmarrësit në konferencë do të nënshkruajnë kontrata të reja për financimin e rimëkëmbjes së Ukrainës, me marrëveshje të reja që përfshijnë kompani italiane si kompania e energjisë Enel dhe ajo e industrisë ajrore e mbrojtjes, Leonardo.