Adhuruesit e jetës së natës me siguri që e kanë provuar ndonjëherë tymin që hidhet nëpër diskoteka për të ndezur atmosferën.
Ky lloj tymi mund t’i ketë dalldisur, por as nuk i ka ngufatur, as nuk i ka bërë t’u shkojnë lotët, shkruan sot Koha Ditore.
Tym i tillë, avokati Arianit Koci po pretendon se është lëshuar në Kuvendin e Kosovës nga klientja e tij, Donika Kadaj – Bujupi, për ta penguar seancën plenare.
Këtë veprim Koci po e cilëson se është në kuadër të fushëveprimit të deputetit. Për veprime të tilla Koci thotë se deputeti ka imunitet funksional.
Të gjitha këto pretendime avokati Arianit Koci i ka hedhur në një ankesë që të enjten e ka dorëzuar në Gjykatën e Apelit, me të cilën ka kërkuar lirimin e shefes së grupit parlamentar të AAK-së, Donika Kadaj – Bujupi. Asaj, Gjykata Themelore e Prishtinës ia ka caktuar një muaj paraburgim të mërkurën për shkak të dyshimit se ka kryer veprën penale “përdorimi i armës apo mjetit të rrezikshëm”.
