Ministri i Bujqësisë Faton Peci mori pjesë në Forumin Global për Ushqim dhe Bujqësi, konferencë kjo e cila mbahet në Berlin dhe organizohet nga Ministria Federale për Ushqim dhe Bujqësi në bashkëpunim me Senatin e Berlinit.
“Cilësia e tokës bujqësore dhe siguria ushqimore ishte tema e këtij viti ku u zotuam se përmes politikave tona bujqësore do të angazhohemi që t’i adresojmë shqetësimet të cilat lidhen me cilesinë e tokës, sigurinë ushqimore, mbrojtjen e biodiversitetit, ruajtjen e tokës nga degradimi si dhe shfrytëzimin e qëndrueshëm të saj me c’rast u miratua edhe Deklarata e Përbashkët e shteteve pjesëmarrëse e titulluar “Shfrytëzimi i Qëndrueshëm i Tokës: Siguria Ushqimore fillon nga toka”, shkruajti Peci, raporton Syri.net Kosova.
“Përmes adresimit tim online në këtë forum, theksova disa nga hapat e ndërmarrë në lidhje më tokën bujqësore duke u nisur nga themelimi i Task Forcës për Ruajtjen dhe Mbrojtjen e Tokës Bujqësore nga ndërtimi dhe hartimi dhe miratimi i Koncept – Dokumentit për Tokën Bujqësore.
Gjatë këtij viti do të finalizohet Ligji për Tokën Bujqësore i cili rregullon menaxhimin e tokës bujqësore përfshirë edhe atë në pronësi shoqërore.
Pjesë e agjendës legjislative të këtij viti është dhe Koncept-Dokumenti për Rregullimin e Tokës i cili do të rregullojë konsolidimin / komasacionin e tokës.”, ka përmendur më tej hapat konkretë kreu i MBZHR-së.
