Kryetari i Komunës së Drenasit, Ramiz Lladrovci, ka konfirmuar publikisht se ka marrë përkrahje nga Azem Syla, njëri nga figurat historike të Partisë Demokratike të Kosovës (PDK), për krijimin e subjektit të ri politik PDKRLL, me të cilin synon të garojë në zgjedhjet e ardhshme lokale në Drenas.
Pasi PDK nuk e rikandidoi për mandatin e ardhshëm, Lladrovci vendosi të krijojë një iniciativë të re për të vazhduar angazhimin politik. Përmes një postimi në Facebook, ai shprehu mirënjohje për Sylën, duke bërë dallimin mes bashkëpunimeve të ndërtuara mbi vlera dhe atyre të motivuara nga interesa personale, transmeton lajmi.net
“Disa i bashkon e kaluara dhe historia, puna dhe rruga e nderit, e disa i bashkon lakmia, xhelozia, hakmarrja dhe padija! Faleminderit Azem Syla!”, ka shkruar Lladrovci.
Kjo deklaratë vjen në një moment kur skena politike në Drenas po përjeton ndarje dhe ristrukturime, pas vendimit të PDK-së për të mos e rikandiduar Lladrovcin për kryetar komune.
Me përkrahjen e Azem Sylës, Lladrovci synon të ruajë mbështetjen e një pjese të elektoratit tradicional të PDK-së në Drenas, ndërkohë që PDK tashmë ka zyrtarizuar Petrit Hajdarin për zgjedhjet e tetorit./lajmi.net/
