Po vjen koha e Ramush Haradinajt, tha kreu i Nismës për Kosovën, Fatmir Limaj në protestën në mbështetje të Ramush Haradinajt, i cili po mbahet në Francë, pas ndalimit në bazë të një urdhërarresti ndërkombëtar të Serbisë.
Limaj, tha se të prekësh Haradinajn është të prekësh themelet e shtetit të Kosovës, derisa u shpreh i habitur se si, ekzekutuesit e politikave të Millosheviqit, po luajnë me lirinë e Kosovës.
“E keni tepruar dhe më nuk mund të luani me Kosovën. Është e habitshme se si dy nxënësit, ezkekutuesit e politikës së Millosheviqit, po luajnë me lirinë e Kosovës.Është fyese për secilin vend demokratik. Boll më se e keni tepruar. Mos luani me Kosovën. Me prek Ramush Haradinajn, është me i prek themelet e shtetit”, tha ai.
Limaj tha se nëse ai e Haradinaj i janë përgjigjur drejtësisë ndërkombëtare, nuk janë të gatshëm ta ulin kokën para xhelatit, duke aluduar në Serbinë.
“Nëse i jemi përgjigjur drejtësisë, s’do të thotë se jemi të gatshëm ta ulim kryet para xhelatit. Me Vuçiqin duhet të flasim me gjuhën e tij. Nuk mund të lejojmë që shteti yne të fyhet nga pasardhësit e Millosheviqit”, tha ai. /Periskopi/
