Victoria Beckham ka treguar se çelësi i lëkurës së saj të shndritshme nuk gjendet në një produkt bukurie, por në kuzhinë.
Në një intervistë së fundmi, stilistja dhe ish-anëtarja e “Spice Girls” tha se këshilla më e vyer që ka marrë për lëkurën i erdhi nga dermatologu i saj në Los Angeles, Dr. Harold Lancer.
Kisha probleme me lëkurën dhe ai më këshilloi të haja salmon çdo ditë – në çdo vakt që dëshiroja, por pa e anashkaluar asnjë ditë- tha Victoria.
Edhe pse ideja e konsumimit të një ushqimi të njëjtë çdo ditë mund të duket e mërzitshme, Beckham beson se këmbëngulja ia vlen.
Salmoni është i pasur me acide yndyrore omega-3 dhe omega-6, të cilat nxisin prodhimin e kolagjenit – një proteinë jetike që mban strukturën e lëkurës të fortë dhe elastike.
Me kalimin e moshës, nivelet e kolagjenit bien, çka ndikon në shfaqjen e rrudhave dhe humbjen e tonit të lëkurës. Konsumimi i salmonit ndihmon në ngadalësimin e këtij procesi.
Ekspertët rekomandojnë të konsumohen 150-250 gram salmon 2-3 herë në javë si pjesë e një diete të ekuilibruar. Një porcion i tillë siguron rreth 2.5 gramë omega-3, një sasi shumë më e lartë se doza ditore e nevojshme prej 500 mg, shkruan Tar.
Omega-3-të nuk janë të dobishme vetëm për lëkurën – ato kontribuojnë edhe në shëndetin e zemrës, trurit dhe sistemit imunitar. Në të njëjtën kohë, kanë efekt anti-inflamator dhe ndihmojnë në uljen e triglicerideve dhe kolesterolit.
Pra, nëse doni një lëkurë të bukur si e Victoria Beckham, ndoshta është koha të shtoni salmonin në menunë tuaj javore
