Bordi i Përkohshëm i Telekomit të Kosovës i emëruar nga Qeveria e drejtuar nga Avdullah Hotin ka dhënë sot dorëheqje.
Kjo u bë e ditur përmes një komunikate të lëshuar nga Qeveria e Kosovës.
Ndër të tjera në këtë komunikatë thuhet se Hoti e ka pranuar me shqetësim dorëheqjen e Bordit të përkohshëm të Telekomit të Kosovës, në një situatë të vështirë financiare të kësaj ndërmarrjeje publike të rëndësisë strategjike për vendin.
“Qeveria e Republikës së Kosovë nuk e mirëpret aspak këtë veprim të Bordit të Telekomit. Vërejtjet e ngritura edhe nga Sindikata e Telekomit janë shqetësuese për Qeverinë si aksionar. Qeveria është e vendosur që të mos lejojë degradimin e mëtejmë të kësaj ndërmarrjeje me rëndësi strategjike për vendin. Prandaj, në cilësinë e aksionarit, Qeveria do të ndërmarrë të gjithë hapat e nevojshëm institucionalë për të ndaluar veprimet e tilla dhe për të siguruar kushte për rimëkëmbjen e Telekomit të Kosovës”, ka thënë kryeministri Hoti.
Ndryshe, Telekomi i Kosovës tash e disa kohë po përballet me vështirësi.
