Është vetëm 14 vjeçar, por kjo nuk e bën inferior krahas ‘gardianëve’ të parë të FC Drenicës. Altin Gjokaj tash e një kohë stërvitet me skuadrën e parë të ‘kuqezinjëve’, madje ai është bashkuar me ekipin në fazën përgatitore të cilën klubi nga Skenderaj po e zhvillon në Durrës, shkruan Gazetasheshi.com.
Gjatësia prej 1,80 centimetra i ka mundësuar ‘gardianit’ të ri nga Skenderaj që të ofrojë garancën e duhur për katërkëndëshin e portës, jo vetëm për bashkëlojtarët e grupmoshës 15 vjeçare te Drenica, por edhe të skuadrës së parë.
Gjokaj i cili aktualisht ndodhet në fazën përgatitore me ‘kuqezinjtë’ thotë se është duke punuar fortë që një ditë të jetë pjesë e skuadrës së parë të Drenicës dhe të vazhdojë më pas edhe ëndrrën drejt Evropës.
“Është një nder dhe privilegj që të jem i grumbulluar së bashku me ekipin e parë të Drenicës. Përgatitjet janë duke shkuar mirë, unë jam duke dhënë maksimumin nga vetja ime që të mësoj sa më shumë dhe të përgatitem për të ardhmen”, deklaroi Gjokaj.
Ëndrra e ‘gardianit’ U15 të Kosovës është që një ditë të ruajë portën e Kosovës A dhe të vazhdojë karrierën drejt Evropës.
“Normalisht si çdo i ri edhe unë synoj që një ditë karrierën ta vazhdojë jashtë vendit. Ter Stegen është modeli im, ndërkohë që kisha patur shumë dëshirë që të vazhdoj në kombëtaret zingjir të Kosovës dhe të kaloj më pas në ekipin A”, deklaroi Gjokaj.
Ai është pjesë e 15 vjeçarëve të Drenicës, por jo rrallë herë ruan portën edhe tek më të rriturit.
Gjokaj mbetet një e ardhme e ndritur dhe një shpresë se si vitet janë vetëm numra dhe se puna gjithmonë ndodhet në rend të parë.
