Kuvendi i Kosovës do të mblidhet në orën 11:00 në një seancë të jashtëzakonshme, iniciuar nga Partia Demokratike e Kosovës, për çështjen e Ligjit për Rimëkëmbjen Ekonomike.
E vetmja pikë e rendit të ditës do jetë, ”Shqyrtimi i dytë i Projektligjit nr. 07/L-016 për Rimëkëmbjen Ekonomike – COVID-19”, thuhet në njoftimin e Kuvendit të Kosovës, përcjellë Klan Kosova.
Seanca e së premtes, është thirrur nga Partia Demokratike e Kosovës e cila ka propozuar disa amandamente për këtë projektligj.
Në to, përfshihen 200 milionë euro për bizneset, kompensim i parave të trustit për të gjithë personat që kanë deri në 10 mijë euro kursime dhe 300 euro për të gjithë ata që e kanë humbur punën gjatë pandemisë.
Kosova tash e nëntë muaj ballafaqim me pandeminë nuk ka arritur ta votojë Ligjin e Rimëkëmbjes Ekonomike ndonëse i njëjti u soll shtatë herë në Kuvend për votim.
