Gjykata Kushtetuese e ka vlerësuar të pakonstituuar Kuvendin e Kosovës.
Ajo publikoi dispozitivin e aktgjykimit sot, duke bërë të ditur se konstaton se “Seanca Konstituive e Kuvendit, e filluar me 15 prill 2025 nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit Serb”.
Kushtetuesja kërkon zgjedhjen e të pesë nënkryetarëve, përfshirë atë nga komuniteti serb. Lidhur me këtë, gjykata i referohet paragrafit 1 dhe 4 të nenit i cili flet për zgjedhjen e dy nënkryetarëve nga komunitetet joshumicë.
Gjykata urdhëroi që seanca konstituive të përfundojë brenda afatit prej 12 ditëve nga hyrja në fuqi e këtij aktgjykimi.
Deputetët janë urdhëruar që funksionin e tyre ta ushtrojnë në “interesin më të mirë të Republikës së Kosovës” dhe ta zgjedhin nënkryetarin serb.
“TË URDHËROJË, të gjithë deputetët e zgjedhur të Kuvendit të Republikës së Kosovës, që në pajtim me nenin 4 [Forma e Qeverisjes dhe Ndarja e Pushtetit], nenin 7 [Vlerat], paragrafin 4 të nenit 67 [Zgjedhja e Kryetarit dhe Nënkryetarëve] dhe nenin 74 [Ushtrimi i Funksionit] të Kushtetutës së Republikës së Kosovës, që gjatë procedurës së zgjedhjes së nënkryetarit të Kuvendit të Republikës së Kosovës nga radhët e deputetëve të komunitetit Serb, të ushtrojnë funksionin e tyre kushtetues në interesin më të mirë të Republikës së Kosovës dhe në pajtim me Kushtetutën dhe Rregulloren e Kuvendit”, thuhet në njoftim.
