Kryetarja e Alternativës, Mimoza Kusari-Lila, është shprehur e bindur se Qeveria Kurti 3 do të krijohet.
Në emisionin “DPT te Fidani”, ish-deputetja tha se për krijimin e qeverisë, i kanë 65 vota.
“Ne jemi një grup parlamentar me 57 deputetë, dhe natyrisht me një bashkëpunim prej tetë deputetë nga grupi parlamentar të komuniteteve joshumicë joserbe, përfshirë edhe Rashiqin. Ne nuk jemi takuar ende bashkërisht ende me diskutu formën e votimit në GP-në tonë”, tha Kusari-Lila në Klan Kosova.
Pos tjerash, ajo foli edhe për zgjedhjen e presidentit/es të Kosovës.
Sipas saj, partitë politike duhet të ulen dhe të flasin me njëra-tjetrën për t’u dakorduar në këtë çështje.
“Përveç konstituimit të Kuvendit dhe Qeverisë, është pastaj votimi për marrëveshjet ndërkombëtare dhe për president/e. Këtu duhet të jemi bashkë si kastë politike. Për pozitën e presidentit ose presidentes duhet me u taku me partitë politike dhe me i dëgju se çka janë idetë e tyre për këtë rast”, tha ajo.
