Në lagjen “029” në Fushë Kosovë, projekti për ujësjellësin është zvarritur, qytetarët po kërkojnë zgjidhje më të shpejtë, ndërsa kompania thotë se moti i ligë ka ndikuar që punimet të ngecin
Kryeministri në detyrë, Albin Kurti premtoi se ky projekt i cili ishte nënshkruar në janar të 2023-ës, do të përfundojë në fillim të dhjetorit të 2025-ës..
Por zgjidhja e problemit me ujin e pijes për lagjet 028 e 029, Bardhin e Madh e Sllatinën e Madhe të Fushë Kosovë është larg finalizimit.
Punimet u ndërprenë e projekti u zvarrit, derisa janë vendosur vetëm gypat e lidhjet e ujit s’janë bërë ende.
E tek këtë të shtunë nisi të punohej sërish diçka. Por për banorët këtu gjithçka po bëhet “shkel e shko”
Ata shprehin pakënaqësi me zvarritjen e punimeve, ndërsa një banor tjetër vazhdon të gjejë mënyra alternative të furnizimit.
E gjithë lagjja shumicën e kohës vijon të jetë pa ujë.
Për krejt zvarritjen e punimeve, faji po i lihet motit të ligë. Ky është arsyetimi për televizionin prapa kamerave nga kompania “Infra Plus” që ka fituar tenderin.
Ndërsa nga KRU Prishtina thonë se vitin e kaluar kanë bërë kërkesë për punë shtesë, por nuk iu është aprovuar.
Projekti që u nënshkrua si bashkëpunim e bashkëfinancim mes komunës së Fushë Kosovës, Ministrisë së Pushtetit Lokal e asaj të Infrastrukturës është e paqartë se kur do të përfundojë.
Nga qeverisja lokale në ikje, faji po i lihet nivelit qendror që mban pushtetin në detyrë.
Televizioni kontaktuar edhe MAPL-në dhe Ministrinë e Infrastrukturës, por të njëjtit ishin të paqasshëm.
