Kryeministri në detyrë, Albin Kurti, ka folur për kërkesën për opinion në Komisionin e Venedikut në lidhje me kompetencat e Presidentit në shpërndarjen e Kuvendit dhe në kompetencat e tij për propozimin e mandatarit për Kryeministër të vendit, pas mocionit të suksesshëm të mos-besimit, shkruan Gazeta Sinjali.
Kurti përmes një postimi në Twitter ka njoftuar se kërkesa është dorëzuar dje.
Sipas tij, opinioni i Komisionit të Venedikut do ta forcojë demokracinë kushtetuese dhe sundimin e ligjit në Kosovë.
“Dje dërguam një kërkesë për opinion në Komisionin e Venedikut për kompetencat e Presidentit të Kosovës për mandatimin e kandidatit për kryeministër pas mocionit të mosbesimit. Opinioni do ta forcojë demokracinë kushtetuese dhe sundimin e ligjit”, ka shkruar Kurti.
Ndryshe, në njoftimin e sotëm për media nga Zyra e Kryeministrit theksohet se kjo është hera e parë që Kosova dërgon kërkesë për opinion në Komisionin e Venedikut, në lidhje me raportin e institucioneve kushtetuese dhe kompetencat e tyre./Gazeta Sinjali/
