Kryetari i Vetëvendosjes, Albin Kurti, pasi u konfirmua kandidat për kryeministër nga delegatët e partisë, deklaroi se zgjedhjet e jashtëzakonshme kanë ardhur “pa dëshirën” e tij dhe të Lëvizjes.
Ai tha se partitë tjera politike kanë refuzuar çdo mundësi bashkëpunimi me Vetëvendosjen, raporton lajmi.net
“Pa dëshirën time dhe pa vullnetin e Lëvizjes sonë, por si pasojë e refuzimit nga subjektet tjera për të pasur çfarëdo bashkëpunimi me neve. Asnjë nga to nuk po arrin ta pranojë realitetin, e sidomos disa prej tyre të cilave iu ofruam bashkëpunim. Së pari më refuzuan mua, pastaj edhe Glauk Konjufcën – të dyja herët të gjithë votuan bashkë kundër qeverisë së Vetëvendosjes.” – tha Kurti.
Kurti shtoi se vendi nuk po përballet me probleme ekonomike apo buxhetore, por me një krizë të shkaktuar, sipas tij, nga bllokimet politike.
“Kosova nuk ka krizë ekonomike, nuk ka krizë financiare, nuk ka krizë buxhetore. Mirëpo ka krizë legale procedurale nga bllokimet e opozitës, e cila po synon që këtë ta shndërrojë në krizë sociale.” – u shpreh ai./Lajmi.net/
