Kryetari i Partisë Demokratike të Kosovës (PDK), Memli Krasniqi, ka reaguar ashpër pas shpalljes së Kuvendit të Kosovës si të konstituuar, edhe pse ende nuk është zgjedhur nënkryetari nga komuniteti serb – një detyrim kushtetues.
Duke e quajtur veprimin si “përtej talljes me shtetin”, Krasniqi tha se kjo qasje e Lëvizjes Vetëvendosje përbën jo vetëm mungesë përgjegjësie, por edhe rrezikshmëri për rendin kushtetues.
“Qytetarët po e shohin dhe nuk do ta harrojnë. Përtej talljes me shtetin, është bërë edhe e rrezikshme”, deklaroi ai.
Krasniqi krahasoi mënyrën e zhvillimit të seancës me një spektakël televiziv.
“E kanë kthyer në Big Brother Kuvendin – me pa kush po eliminohet e kush po humb. Kjo s’ka ndodhë asnjëherë. Ka mungesë totale të përgjegjësisë dhe shpërfillje të rendit kushtetues”, shtoi ai.
Ai paralajmëroi se me këtë qasje, Vetëvendosja po thellon shkeljet kushtetuese: “Janë duke sharruar edhe më tej në shkelje kushtetuese”./IndeksOnline/
