Shefi i Grupit Parlamentar të PDK-së, Memli Krasniqi në seancën e sotme të Kuvendit, ka thënë se tema e ikjeve të të rinjve jashtë vendi është dashur të diskutohet shumë më herët.
Sipas tij, seanca në fjalë është hirrur pa asnjë paralajmërim dhe se sipas tij nuk është e udhës të vendoset aq shpejtë për një seancë të kësaj natyre.
“Kjo temë është shumë e rëndësishme dhe e ka merituar më herët të diskutohet. Deputetët e dijnë që kjo seancë është thirrur papritmas dhe nuk ka qenë mënyra e duhur të vendoset në një shpejtësi kaq të madhe për një temë kaq të rëndësishme. Ne kemi mundur që këtë çështje ta trajtojmë edhe në seancat e rregullta. E them këtë sepse shumica e deputetëve këtu kanë ardhur për një seancë tjetër dhe pika tjera. Dhe meqenëse është kështu unë kam frikë që shumica e tyre nuk janë të përgatitur në mënyrën më të mirë për të diskutuar”, ka thënë ai.
Ai po ashtu ka përmendur edhe seancat e shpeshta të jashtëzakonshme që po mban Kuvendi i Kosovës, duke potencuar se kjo mund t’i japë dikujt përshtypjen se vendi është në gjendje konflikti.
“Kjo është seanca e 13-të e jashtëzakonshme për tre muaj që është mbajtur, nëse këtë ia themi dikujt i bie se ne jemi në gjendje të luftës apo konflikti. Unë besoj që nga këto 13 seanca disa kanë qenë të qëlluara por nuk besoj që ky është precedent më i mirë. Fenomeni i ikjeve është shqetësues për shumicën prej nesh dhe nuk është fenomen i ri, apo i viteve të fundit. Kriza më e madhe ka qenë në fillim të vitit 2015 ku me dhjetëra mijëra kanë ikur nga vendi”, ka thënë ai.
Krasniqi ka bërë të ditur se qëndrimi i PDK-së është që bashkarisht të dakordohet një rezolutë që do të rekomandojë hapa konkret për përmirësimin e gjendjes.
