Komandanti i forcës paqeruajtëse të NATO-s në Kosovë (KFOR), Gjeneral Enrico Barduani, ka zhvilluar një takim zyrtar në Tiranë me Ministrin e Mbrojtjes së Shqipërisë, Pirro Vengu, dhe Shefin e Shtabit të Përgjithshëm të Ushtrisë Shqiptare, Gjeneralleitnant Arben Kingji.
Gjatë takimit, Barduani ka theksuar përkushtimin e vazhdueshëm të KFOR-it për garantimin e sigurisë dhe stabilitetit në Kosovë, duke theksuar edhe rëndësinë e dialogut Kosovë–Serbi të ndërmjetësuar nga Bashkimi Evropian, transmeton lajmi.net.
Në deklaratën zyrtare të KFOR-it thuhet se Gjenerali Barduani ka shprehur mirënjohje për rolin aktiv dhe profesionalizmin e kontingjentit shqiptar në misionin në Kosovë, duke vlerësuar kontributin e Shqipërisë në forcimin e paqes dhe sigurisë në rajon.
“KFOR-i mbetet i përkushtuar për të siguruar një mjedis të sigurt dhe të qëndrueshëm për të gjitha komunitetet në Kosovë,” u shpreh Barduani, duke nënvizuar nevojën për bashkëpunim të ngushtë ndërmjet Shqipërisë dhe misionit të NATO-s në Kosovë.
Takimi në Tiranë vjen në një periudhë të ndjeshme për zhvillimet në rajon, ku KFOR-i vazhdon të jetë aktor kyç në ruajtjen e stabilitetit në terren.
Njoftimi i plotë:
Sot, gjeneralmajor Enrico Barduani, komandant i misionit të udhëhequr nga NATO – KFOR, vizitoi Ministrin e Mbrojtjes së Shqipërisë, z. Pirro Vengu, dhe Shefin e Shtabit të Përgjithshëm të Ushtrisë Shqiptare, gjeneralleitnant Arben Kingji, në ambientet e Ministrisë së Mbrojtjes në Tiranë.
Diskutimet u përqendruan në angazhimin e vazhdueshëm të KFOR-it për ruajtjen e sigurisë dhe stabilitetit në Kosovë dhe në rajon, si dhe në rëndësinë e dialogut të lehtësuar nga BE-ja ndërmjet Beogradit dhe Prishtinës.
Gjenerali Barduani theksoi se KFOR-i mbetet i përkushtuar për të garantuar një mjedis të sigurt dhe të qëndrueshëm për të gjitha komunitetet.
Ai gjithashtu shprehu mirënjohjen e tij për profesionalizmin dhe përkushtimin e kontingjentit shqiptar në KFOR, duke theksuar kontributin e çmuar të tyre në mision, si dhe në promovimin e paqes dhe stabilitetit në Ballkanin Perëndimor.
Gjenerali Barduani gjithashtu nënvizoi rëndësinë e bashkëpunimit të qëndrueshëm dhe partneritetit ndërmjet KFOR-it dhe Shqipërisë.
KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të Kombeve të Bashkuara (1999) – për të kontribuar në krijimin e një ambienti të sigurt dhe të qëndrueshëm për të gjithë njerëzit dhe komunitetet që jetojnë në Kosovë, si dhe për të siguruar lirinë e lëvizjes, në çdo kohë dhe në mënyrë të paanshme.
KFOR-i punon në bashkërendim të ngushtë me Policinë e Kosovës dhe me Misionin e BE-së për Sundimin e Ligjit në Kosovë (EULEX), në kuadër të përgjegjësive të tyre për siguri./lajmi.net/
