Publicisjta Kimete Berisha ka reaguar ndaj kritikave të shumta ndaj Qeverisë Kurti pasi shteti ynë pranoi si donacion nga Serbia rreth 1000 teste për detektimin e infektimit me koronavirus, shkruan Veriu.Info
Berisha, në një postim në rrjetin social, Facebook, ka theksuar se në luftë, sipas disa të dhënave, kemi blerë edhe armë nga Serbia për ta luftuar pikërisht atë, dhe kemi blerë edhe ushqim.
Ajo tha se parimisht ndihma nuk duhet të refuzohet, edhe nëse vjen nga një armik publik si Serbia.
Postimi i plotë:
Patriotizëm medicinal ?.
Nëse është e vërtetë (siç ka thënë ish shefi i SHIK-ut në Shqipëri, Fatos Klosi) se ‘kur Shqipëria nuk i jepte armë UÇK-së, shqiptarët kanë blerë armë nga depot e armatimit të Serbisë’, atëherë ku ka paradoks më të madh se ky!
Blen armë nga armiku, që me armën e tij m’u mbrojtë nga Ai.
Por, duket paradoks edhe më i madh, nëse e shikon këtë marifet nga ana serbe: serbi i shet armë armikut shqiptar për t’u ‘vrarë’ nga Ai.
(Për ushqime mos të flasim, ato janë blerë nga serbët gjatë luftës, dhe aty s’ka pas asnjë dilemë morale.
Buka-bukë, armiqësia-armiqësi).
– Goxha njëfarë paradoski është edhe ky:
Armiku publik serb t’i falë sot 1000 teste për ta zbuluar armikun e padukshëm global.
Ky donacion para se ta zbuloj koronavirusin, e ka zbuluar se: ‘Testi i armikut tim është armiku im’.
– Ato teste nuk do të mund të refuzoheshin sepse republika jonë është multietnike, në Kosovë jetojnë edhe serbë, të cilët i mirëpresin ato teste.
Parimisht ndihma nuk refuzohet.
Shoh shumë shkrime edhe kundër ndihmave të Erdoganit, të cilit disa shqiptarë (pronarë portalesh), nuk ia harrojnë Perandorinë Osmane dhe vazhdimisht e ushqejnë ‘armiqësinë’ me të kaluarën tonë historike.
Prandaj, neve na ndodh sot gjithë ky trishtim: sepse, jetojmë në të kaluarën.
Armiqësitë e vjetra nuk harrohen. Por, çudi dhe shyqyr që e harruat së paku Perandorinë Romake. S’di pse e harruat, se ajo ‘armiqësi’ ka mundur të jetë ‘atraktive’ nëse do ta ushqenit me rregull!
– Kjo ndihma e Serbisë me teste do të mund të keqinterpretohej si e refuzuar shumë më shumë seç keqinterpretohet sot si e pranuar.
– Keqinterpretohet nga ata që deri në mesnatë e pritën në një këmbë ‘Listën Serbe’ të kthehet nga Beogradi (ku kishte shkuar për të marrë leje nga Vuçiqi për ta bërë Haradinaj Kryeministër.
Nga Vuçiçi varej qeveria Haradinaj.
A më e madhe është kjo ndihmë serbe apo 1000 teste.
Testet shpenzohen. Harxhohen.
Pra, kemi të bëjmë me ‘tradhti shpenzuese’, jo me ‘tradhti’ historike, që e krijoi qeverinë e Kosovës.
Pra, ish qeveria Haradinaj që u bë me aminin e Vuçuçit, nuk është ‘izdajica’.
E Qeveria Kurti që nuk u bë me aminin e Vuçiçit është ‘izdajica’!
Çka e bëri tradhtare qeverinë Kurti?
E bën 1000 teste.
Lirë ?♀️.
Por, derti të çon te dera e hasmit.
Shqiptarët shërohen në Beograd, nuk e konsiderojnë ilaçin si akt tradhtie, sepse gjithmonë ilaçin shqiptarët e kanë lyp
gjithkund pa paragjykime, pa komplekse dhe pa dallime fetare e politike: muslimani në kishë, i krishteri në xhami, kudo, sepse sëmundja nuk ka përkatësi kombëtare e fetare.
Të vjen me vjell kur i sheh sot do burra e do gra, të cilët që nga paslufta e kanë pasaportën e Serbisë;
– që bëjnë politikë dhe tregti me serbët;
– që dashurohen në serbët dhe që kanë shoqëri të ngushtë me ta;
– ata që e kanë vjedh buxhetin e Kosovës, ata sot bëjnë patriotizëm me 1000 teste.
‘Patriotizëm medicinal’ është ky…këtë nuk e ka marrë parasysh as Hipokrati.
P.S. Netanjahu këtyre ditëve i kish lyp ndihmë mjekësore Kancelares Merkel (i kish lyp respiratorë në luftë kundër koronavirusit) por shkruan se Kancelarja e kish refuzu, pa dhënë detaje të tjera.
A më keq është me ta refuzu kërkesën për ndihmë, apo me pranu ndihmën pa e kërkuar!
?♀️
Veç Cicero kish ditë m’u përgjegj në këso dilema ‘luksoze’.
