Mbrëmë Kosova theu rekord të rasteve të reja me koronavirus, me gjithësej 79 raste, duke bërë që numri i përgjithshëm i rasteve në vend të arrijë në 362, duke prekur edhe disa komuna për herë të parë, shkruan Gazeta Metro.
Me rritjen e numrit u zgjerua edhe harta e komunave të prekura në Kosovë, përkatësisht u shënuan rastet e para me koronavirus edhe në Rahovec e Istog.
Megjithatë, janë edhe 7 komuna në vend të cilat ende nuk janë prekur nga pandemia COVID-19.
Komunat të cilat nuk kanë shënuar ende asnjë rast me koronavirus janë: Juniku, Kaçaniku, Deçani, Mitrovica Jugore, Novobërda, Dragashi, dhe Shtërpca.
Deri tani, në Kosovë janë konfirmuar 362 raste pozitive me koronavirus, 59 prej të cilëve janë shëruar, 7 të tjerë kanë ndërruar jetë. Kurse, 9 komuna janë futur në karantinë.
Me vendim të Ministrisë së Shëndetësisë, komunat të cilat kanë hyrë në karantinë janë: Prizreni, Prishtina, Ferizaj, Malisheva, Klina, Vitia, Suhareka, Zveçani dhe Mitrovica e Veriut./gazetametro.net
