Këta janë futbollistët pa kontratë, secili më i mirë se tjetri
Afati kalimtar i verës po shkon drejt fundit, por në tregun e futbollit ende kanë mbetur disa emra të mëdhenj pa klub.
Pavarësisht karrierave të tyre të bujshme, trofeve të fituar dhe eksperiencës në nivelet më të larta të futbollit evropian, këta futbollistë aktualisht janë në kërkim të një skuadre të re.
Në mesin e emrave që janë pa kontratë ka edhe ish-yje të Premier League, La Liga, Ligue 1 dhe Serie A, shkruan Indeksonline.
Paul Pogba është një prej emrave më të mëdhenj në këtë listë. Mesfushori francez, ish-kampion i botës me Francën dhe ish-lojtar i Manchester United, është aktualisht lojtar i lirë.
Karim Benzema, një prej sulmuesve më të suksesshëm të gjeneratës së tij, gjithashtu është larguar nga Al-Hilal dhe e ardhmja e tij mbetet e paqartë, me mundësinë e pensionimit gjithashtu të përmendur.
Në treg ndodhet edhe Riyad Mahrez, ish-ylli i Manchester Cityt, i cili pas aventurës në Arabinë Saudite është në kërkim të një klubi të ri.
Raheem Sterling është një tjetër emër i madh që pret ofertën e duhur. Ish-sulmuesi i Manchester Cityt, Liverpoolit dhe Chelseat e mbylli aventurën e fundit te Feyenoord.
Lista vazhdon me Jadon Sancho, i cili pas një sezoni jo të mirë te Aston Villa mbeti pa kontratë. Për anglezin janë përmendur disa destinacione, përfshirë një rikthim të mundshëm te Borussia Dortmund.
David Alaba, mbrojtësi austriak me një karrierë të jashtëzakonshme te Bayern Munich dhe Real Madrid, është gjithashtu ndër emrat që aktualisht kërkojnë klub të ri.
Në këtë listë gjenden edhe:
Lexo edheMitrovica eliminohet nga garat e UEFA-s, deklasohet nga skuadra ukrainase
Philippe Coutinho – ish-ylli i Liverpoolit dhe Barcelonës
Mauro Icardi – sulmuesi argjentinas, dikur ndër golashënuesit më të spikatur në Serie A
Anthony Martial – ish-sulmuesi i Manchester Unitedit
Wilfried Zaha – një prej figurave më të njohura të Crystal Palace
Dani Carvajal – ish-mbrojtësi i Real Madridit dhe një prej lojtarëve më të trofeshëm të futbollit evropian
Marcelo – legjenda braziliane dhe ish-mbrojtësi i Real Madridit
Emrat e tyre tregojnë se edhe në një merkato ku klubet kanë shpenzuar miliona euro, ende mund të gjenden futbollistë me eksperiencë të jashtëzakonshme pa kosto transferimi.
Tani mbetet të shihet se cili prej tyre do ta gjejë skuadrën e re dhe nëse ndonjëri do të rikthehet në nivelet më të larta të futbollit evropian. /IndeksOnline/
