Një këshilltar i lartë i Shtëpisë së Bardhë ka sulmuar Gjykatën Federale të Apelit në Amerikë për mbështetjen e vendimit për pezullimin e urdhër-ndalimit për emigrantët dhënë nga presidenti, Donald Trump.
Stephen Miller tha për mediat amerikane se vendimi i gjykatës ishte një “uzurpim gjyqësor i pushtetit” dhe se “fuqia e presidentit nuk duhet të vihet në pikëpyetje”.
Gjykata hodhi poshtë përpjekjen e Trump për të rivendosur ndalimin e emigrantëve nga shtatë shtete me shumicë myslimane sërish ditën e enjte, transmeton Klan Kosova.
Ky ndalim shkaktoi kaos në aeroportet amerikane duke nxitur edhe shumë protesta në të gjithë vendin.
Disa padi janë ngritur kundër këtij ndalimi derisa një gjykatës federal ka lëshuar një vendim që përkohësisht ka pezulluar këtë vendim të Trump.
Trump ka thënë se ai mund të luftojë këtë çështje në gjykata, por mund të marrë po ashtu në konsideratë dhënien e një urdhri të ri ekzekutiv.
