Këshilltari i presidentit të Kosovës Hashim Thaçit, Adil Behramaj ka publikuar një dokument në të cilin shihet se ushtruesi i detyrës së Ministrit të Punëve të Brendshme, Xhelal Sveçla i ka dhënë leje speciale për të lëvizur lirshëm në tërë territorin e Kosovës, ish-ministrit të shkarkuar nga radhët e Listës Serbe, Aleksandër Jabllanoviq.
Behramaj në postimin bashkëngjitur letrës ka pohuar që Sveçla i ka dhënë leje speciale për lëvizje në tërë territorin e Kosovës njeriut, i cili nënat që nuk i kishin lejuar pelegrinët serbë të hynin në Gjakovë i kishte quajtur egërsira.
Postimi i plotë:
“Xhelal Sveçla, si ushtrues detyre i ministrit, dje i paska dhënë leje speciale për të lëvizur lirshëm në tërë territorin tonë edhe Aleksandër Jabllanoviqit, ish-ministrit të shkarkuar, i cili nënat që nuk i kishin lejuar pelegrinët serbë të hynin në Gjakovë i kishte quajtur edhe egërsira”, ka shkruar Behramaj.
Behramaj rikujtoi se “Lëvizja Vetëvendosje atëherë e kishte shfrytëzuar këtë deklaratë të poshtër të tij për të organizuar protesta të dhunshme, duke e djegur edhe Qeverinë”.
“Tash deputetët e Kuvendit të Kosovës i kërcënojnë edhe me arrestime, kurse leje speciale i japin edhe Aleksandër Jabllanoviqit. Na ka mbetur neve të skuqemi për paturpësinë e tyre”, ka përfunduar Behramaj. /Lajmi.net/
