Kërcënimet me vdekje ndryshojnë qëndrimin e Corinthians për Memphis Depay

Corinthians tërhiqet nga vendimi për largimin e yllit holandez dhe i ofron kontratë të re dyvjeçare

Presidenti i Corinthians, Osmar Stabile, ka konfirmuar vazhdimin e kontratës me sulmuesin holandez Memphis Depay, vetëm një javë pasi klubi kishte vendosur të mos rinovonte marrëveshjen me të. Vendimi i parë kishte shkaktuar zemërim të madh te tifozët, ndërsa drejtuesit e klubit kishin marrë madje edhe kërcënime me vdekje.

Në deklaratat e raportuara nga gazeta spanjolle “Marca”, Stabile konfirmoi se ish-futbollisti i Atletico Madridit dhe Barcelonës do të nënshkruajë një kontratë të re dyvjeçare, e cila do ta mbajë te Corinthians deri në mesin e vitit 2028. Vendimi është miratuar nga bordi drejtues i klubit gjatë një mbledhjeje të zhvilluar të hënën.

“Falë Zotit, gjithçka shkoi mirë. Morëm votat e nevojshme për miratim dhe tani ndihemi të lehtësuar që arritëm ta mbyllim këtë çështje”, deklaroi presidenti i Corinthians.

Stabile bëri të ditur gjithashtu se Depay, i cili luan për klubin brazilian që nga shtatori i vitit 2024, ka pranuar një ulje të konsiderueshme të kushteve financiare në kontratën e re, pasi marrëveshja e tij e mëparshme kishte përfunduar në fund të korrikut.

Vetëm të martën e kaluar, Corinthians kishte njoftuar zyrtarisht se nuk do ta vazhdonte kontratën me sulmuesin 32-vjeçar, duke e arsyetuar vendimin me situatën financiare të klubit.

Në komunikatën e tij, Corinthians kishte theksuar se “marrja përsipër e një kontrate të re të këtyre përmasave, në rrethanat aktuale, nuk është në përputhje me stabilitetin financiar të nevojshëm për të garantuar qëndrueshmërinë e klubit”.

Megjithatë, reagimi i tifozëve e detyroi klubin të ndryshonte kurs. Drejtuesit morën kërcënime të drejtpërdrejta, ndërsa një grup ultrasish u mblodh edhe para shtëpisë së presidentit Stabile, duke ngritur pankarta me mesazhe të ashpra si: “Largohuni, minj” dhe “Disiplina ka marrë fund”.