Të paktën shtatë persona kanë humbur jetën pasi një aeroplan mallrash doli nga pista dhe shpërtheu në flakë në Kentucky, të martën.
Avioni që po digjej, i cili operohej nga kompania amerikane e shpërndarjes UPS, goditi disa ndërtesa kur u rrëzua në mes të ngritjes. Zyrtarët kanë frikë se numri i të vdekurve dhe të plagosurve mund të rritet, shkruan BBC, transmeton IndeksOnline.
Fluturimi 2976 i UPS, një aeroplan mallrash, u rrëzua gjatë ngritjes në Aeroportin Ndërkombëtar të Louisville-it rreth orës 17:15 sipas kohës lokale të martën, duke rrëshqitur nga pista dhe duke goditur ndërtesat aty pranë.
“Avioni shpërtheu në flakë dhe të paktën dy biznese pranë u goditën nga rrënojat”, tha guvernatori i shtetit, Andy Beshear.
Pamjet e paverifikuara të incidentit tregojnë se aeroplani ishte përfshirë nga flakët kur doli nga pista.
Flaka u përhap në disa ndërtesa afër pistës dhe zyrtarët nisën një operacion të madh për të ndaluar përhapjen e mëtejshme të zjarrit.
Banorëve aty pranë iu urdhërua të qëndronin brenda nga frika e shpërthimeve të mëtejshme dhe ndotjes së ajrit. Aeroporti ndodhet në qytetin më të madh të Kentucky-t dhe disa lagje dhe zona biznesi e rrethojnë atë.
Të gjitha operacionet në aeroport janë ndalur.
Zyrtarët kanë konfirmuar shtatë vdekje deri më tani, por kanë paralajmëruar se numri pritet të rritet.
Njëmbëdhjetë persona të tjerë janë plagosur dhe po trajtohen në spital, por zyrtarët lokalë thonë se kjo shifër ka të ngjarë të rritet gjithashtu.
Një hetim paraprak është duke u zhvilluar, por zyrtarët kanë thënë se është shumë herët për të thënë se çfarë e shkaktoi rrëzimin.
Zyrtarët vunë re, megjithatë, se flakët masive ishin për shkak të sasisë së karburantit në bord të avionit, i cili po fillonte një udhëtim drejt Hauait.
Shefi i Departamentit të Zjarrfikësve të Louisville, Brian O’Neal, tha se sasia e karburantit të derdhur në vendin e rrëzimit e shkaktoi një situatë shumë të rrezikshme.
