Instituti Demokratik i Kosovës (KDI) ka reaguar lidhur me situatën e krijuar pas aktgjykimit të Gjykatës Kushtetuese dhe afatit të përcaktuar për konstituimin e Kuvendit, duke theksuar rëndësinë e respektimit të afateve dhe rregullave kushtetuese si themel i stabilitetit institucional.
Në një reagim për media, KDI nënvizon se Presidentja e vendit, si garantuese e funksionimit kushtetues të institucioneve, ka detyrim të ndërmarrë hapa për të ruajtur integritetin e rendit kushtetues. Në këtë drejtim, ata vlerësojnë si hap pozitiv vendimin e saj për t’iu drejtuar Gjykatës Kushtetuese – autoriteti i vetëm që mund të japë interpretim për situatën e krijuar dhe të garantojë respektimin e afateve.
KDI shton se kjo kërkesë e parakohshme mund të paragjykojë vullnetin e deputetëve dhe të dobësojë pritshmërinë për përmbushjen e përgjegjësive të tyre. Sipas institutit, çështja se çfarë ndodh pas përfundimit të afatit kushtetues është dashur të ishte sqaruar menjëherë pas aktgjykimit të Gjykatës, për të shmangur paqartësitë dhe tensionet aktuale.
Gjithashtu, KDI e cilëson si të paarsyeshme edhe kërkesën për pezullimin e afatit kushtetues në formë të masës së përkohshme, pasi kjo – sipas tyre – krijon “komoditet” për mosveprim të deputetëve dhe subjekteve parlamentare.
Në përmbyllje, KDI thekson se aktgjykimi i 26 qershorit ka përcaktuar qartë afatin 30-ditor si obligim kushtetues dhe substancial për konstituimin e Kuvendit, dhe mosrespektimi i tij përbën dështim institucional. Ata u bëjnë thirrje subjekteve parlamentare të tregojnë përgjegjësi, të respektojnë Kushtetutën dhe të veprojnë pa vonesa.
“Gjykata Kushtetuese mund të qartësojë pasojat e skadimit të afatit, por nuk mund të shërbejë si mekanizëm për të pezulluar përgjegjësinë politike”, përfundon reagimi i KDI-së.
