Kryetari i komunës së Skënderajt, Bekim Jashari, ka uruar festën e Fitër Bajramit, të gjithë shqiptarëve kudo që janë, shkruan DrenicaPress
Përmes një postimi në Facebook, Jashari ka shkruar se dëshiron që kjo festë e madhe të festohet në paqe, me shëndet të plotë për të gjithë, gëzim, vullnet të mirë, me mirëkuptim dhe me dashuri e respekt mes njëri-tjetrit.
Ja postimi i plotë i Bekim Jasharit:
Të dashur vëllezër e motra,
Të nderuar qytetarë të Skenderajt,
Duke iu përgëzuar përzemërsisht me rastin e përfundimit të suksesshëm të muajit të shenjtë të Ramazanit, muaj ky që u karakterizua me durim, solidarizim dhe vepra të mira në përputhje me rregullat e islamit, ato që janë të pranuara te Zoti ynë i Madhërishëm, le të vazhdojmë në frymë festive edhe në njërën prej festave më kryesore të islamit – Fitër Bajrami.
Dëshiroj që kjo festë e madhe të festohet në paqe, me shëndet të plotë për të gjithë, gëzim, vullnet të mirë, me mirëkuptim dhe me dashuri e respekt mes njëri-tjetrit.
Dëshiroj që këto vlera t’i mëshirojmë në mendjen dhe shpirtin tonë, dhe t’i largojmë nga vetja, familja dhe shoqëria urrejtjen, xhelozinë, egoizmin e pangopësinë dhe çdo gjë tjetër që shkon në dëm të ardhmërisë së vendit dhe fëmijëve tanë.
Vëllezër e motra,
Shqiptarë kudo që jeni,
Me fat ju qoftë festa e Fitër Bajramit!
