Një sulm ajror izraelit shkatërroi një ndërtesë me shumë kate në lagjen Bashoura të Bejrutit të mërkurën herët në mëngjes, ndërsa raketat goditën edhe zona jashtë fortesave të Hezbollahit, raporton BBC.
Forcat izraelite kishin paralajmëruar evakuimin e ndërtesës dhe zonave përreth. Gazetarët e BBC-së u zgjuan nga shpërthimi rreth orës 05:00, dhe deri tani nuk raportohet për viktima.
Ndërtesa ishte goditur disa herë më parë dhe më pas u shemb plotësisht. Pamjet tregojnë raketën që godet bazën, ndërsa tymi mbushi rrugët dhe ekipet e emergjencës ndihmuan banorët e evakuuar.
Që nga fillimi i konfliktit më 2 mars, mbi 900 persona, përfshirë 111 fëmijë, kanë humbur jetën, dhe më shumë se një milion janë larguar nga shtëpitë, kryesisht në jug dhe lindje të vendit.
