Baret, restorantet, sallonet e floktarëve dhe sallonet e bukurisë do të rihapen në tërë Italinë nga 18 maji.
Autoritetet rajonale kanë marrë leje për t’i larguar masat e kufizimeve ndaj biznevese, të cilat më parë ishin planifikuar për të mos u hapur para 1 qershorit.
Nga 18 maji do të hapen edhe muzetë, dyqanet e shitjes me pakicë dhe bibliotekat, shkruan “The Guardian”, transmeton Gazeta Express.
Ky vendim, i bërë i ditur nga qeveria në orët e vona të së hënës, erdhi pas trysnisë së liderëve rajonalë që të lejohet hartimi i planeve të rihapjes nga rajonet veç e veç.
Sidoqoftë, para rihapjes së këtyre lokaleve, pronarët e tyre duhet të sigurohen për zbatimin e masave të sigurisë. Restorantet do të jenë të detyruara të caktojnë hapësirë prej katër metrave mes tavolinave.
Të hënën, në Itali u shënuan 744 raste të reja të koronavirusit. Kjo ishte shifra më e ulët ditore që nga 4 marsi. Përpos infektimeve, në këtë periudhë u shënuan edhe 179 të vdekur dhe numri i përgjithshëm i viktimave shkoi në 30,739.
