Ish-ushtari i UÇK-së, Jahir Dedia, që po ndërton urat që lidhin Jugun me Veriun i ka reaguar kandidatit për kryetar të Mitrovicës, Faton Peci, pas deklaratave të këtij të fundit në drejtim të tij.
Dedia ka mohuar kategorikisht pretendimet e Pecit, i cili ka thënë se “po merr miliona”. Ai ka theksuar se kurrë nuk ka parë miliona, duke shtuar se për shtatë vite ka jetuar me qira dhe se akuzat e Pecit janë shpifje me qëllim njollosjeje të emrit të tij, të familjes dhe të kompanisë që drejton.
“Unë nuk kam miliona dhe për shpifjet që kanë për qëllim përlyerjen e familjes sime, të kompanisë dhe të kontributit tim, do të takohemi në gjykatë”, ka deklaruar Dedia.
Ai gjithashtu ka reaguar ndaj pretendimit të Pecit se nuk ka qenë pjesë e Ushtrisë Çlirimtare të Kosovës, duke theksuar se kjo është lehtë e verifikueshme pasi komandanti i Zonës Operative të Shalës është gjallë dhe mund ta konfirmojë pjesëmarrjen e tij, transmeton jepizë.
Dedia ka bërë të ditur se do të ndërmarrë masa ligjore ndaj Faton Pecit për këto shpifje.
Ndërkohë, edhe familja e biznesmenit dhe humanistit Agron Zeneli ka reaguar një ditë më parë ndaj deklaratave të Pecit, duke i cilësuar ato si shpifje dhe tentativë për njollosjen e emrit të tij.
