Ish-hetuesja e Gjykatës së Hagës Nevenka Tromp, ishte në mesin e atyre që morën fjalën para mijëra pjesëmarrësve në Prishtinë, në protestën e veteranëve kundër padrejtësive ndaj ish-krerëve të UÇK-së.
Tromp tha se drejtësia e vonuar është drejtësi e mohuar.
“Drejtësia e vonuar është drejtësi e mohuar. Kjo nuk është vetëm një parullë – është realiteti i dhimbshëm që ju po përballeni prej vitesh. Që drejtësia të pranohet, ajo duhet të ketë legjitimitet. E dimë që drejtësia mund të jetë si subjektive ashtu edhe objektive, por në të dyja rastet ajo duhet të zbatohet përmes institucioneve të ligjshme, të qëndrueshme dhe të pavarura. Gjykatat, ligjet dhe profesionistët e drejtësisë duhet të veprojnë në mënyrë të paanshme dhe profesionale. Nëse drejtësia zbatohet në mënyrë selektive apo simbolike, rrezikon të perceptohet si padrejtësi. Në raste të tilla, gjykimet nuk janë më për të zbuluar të vërtetën – por duken si gjykime të inskenuara”, tha ajo.
Ajo theksoi se kjo është veçanërisht e rrezikshme kur politikanët manipulojnë sistemet e drejtësisë për qëllime pragmatike politike, ose kur institucionet e drejtësisë ndihen të detyruara t’i shërbejnë narrativave politike.
“Në vitin 2020, udhëheqësit tuaj të kohës së luftës shkuan vullnetarisht në Hagë, duke besuar – ashtu si edhe ju – se drejtësia do të zbatohej shpejt dhe në mënyrë të drejtë. Ata u siguruan se ky proces do të ishte transparent dhe i paanshëm. Dhe megjithatë, ja ku jemi – pesë vjet më vonë – ata ende janë në paraburgim dhe nuk ka ende një vendim gjyqësor në horizont”, theksoi ish-hetuesja e Hagës.
“Besimi i tyre në një drejtësi të shpejtë është thyer nga realiteti i vonesave, dënimeve të ashpra dhe shkallës disproporcionale të shpalljeve fajtor. Por, mos harroni: të njëjtët udhëheqës që tani janë të akuzuar dhe po gjykohen në Dhomat e Specializuara të Kosovës janë ata që mbështetën krijimin e këtyre dhomave. Ata e bënë këtë duke qenë të vetëdijshëm për rrezikun që përfaqësonte për çdo luftëtar që u ngrit në mbrojtje të lirisë së Kosovës gjatë luftës së viteve 1998–1999”.
