Inspektorati Policor i Kosovës (IPK), përkatësisht hetuesit e Departamentit të Hetimeve, kanë nisur një hetim zyrtar pas një incidenti të ndodhur mbrëmjen e kaluar në Ferizaj, ku dyshohet për tejkalim të autorizimeve policore gjatë një arrestimi.
Sipas njoftimit, Policia e Kosovës ka raportuar në IPK se një veturë nuk i ishte bindur urdhrit për ndalim nga ana e zyrtarëve policorë dhe ishte përcjellë për disa minuta. Më pas, automjeti është ndaluar dhe brenda tij ndodheshin tre qytetarë.
Gjatë ndërhyrjes për arrestimin e të dyshuarve, një nga zyrtarët policorë dyshohet se ka përdorur forcë të tepruar ndaj drejtuesit të veturës, i cili ka pësuar lëndime trupore dhe ka kërkuar ndihmë mjekësore.
IPK ka reaguar menjëherë, duke dërguar hetuesit në vendin e ngjarjes dhe ka filluar procedurat hetimore për të vlerësuar ligjshmërinë e veprimeve të zyrtarit policor. Rasti po hetohet në drejtim të veprave penale “Keqtrajtimi gjatë ushtrimit të detyrës zyrtare ose autorizimeve publike” dhe “Lëndimi i lehtë trupor”.
Në konsultim me Prokurorinë kompetente, është marrë vendim që rasti të trajtohet në procedurë të rregullt, ndërkohë që IPK ka rekomanduar suspendimin e zyrtarit policor të përfshirë në këtë ngjarje, në përputhje me autorizimet ligjore dhe në interes të hetimeve.
Hetuesit e IPK-së, në bashkëpunim të ngushtë me prokurorin përgjegjës, pritet të ndërmarrin veprime të mëtejshme për të ndriçuar të gjitha rrethanat e këtij incidenti.
