Inspektorati Policor i Kosovës (IPK) ka publikuar raportin “Reagimi në thirrjet e qytetarëve dhe raportimi i aktiviteteve policore”, ku konstatohet se koha mesatare e reagimit të Policisë së Kosovës për vitin 2025 është 13.7 minuta – njëjtë si në vitin 2022.
“Koha mesatare e reagimit policor për këtë vit në nivel vendi që është 13.7 minuta, ka rezultuar e njëjtë si në matjet nga viti 2022”, thuhet në njoftim.
Sipas IPK-së, ky tregues nuk ka shënuar përmirësim në nivel vendi krahasuar me matjet e tri viteve më parë, ndonëse janë vërejtur disa ndryshime në nivel stacionesh dhe drejtorish rajonale.
Në raport theksohet se Drejtoritë Rajonale në Ferizaj, Mitrovicë e Veriut dhe Mitrovicë e Jugut kanë kohë më të shpejtë reagimi krahasuar me rajonet tjera.
Gjetjet e raportit, sipas IPK-së, janë të rëndësishme për strukturat drejtuese dhe operative të Departamentit të Rendit Publik dhe për stacionet policore në përgjithësi./Indeksonline/
