Në prani të zyrtarëve të Kryesisë së Bashkësisë Islame të Kosovës, të Ministrisë së Mirëqenies Sociale, të Agjencionit të Regjistrimit Civil, Agjencionit të Shoqërisë së Informacionit, UNFPA-së dhe OSBE-së, në selinë e Këshillit të Bashkësisë Islame të Prishtinës u bë përurimi i projektit të evidentimit të rasteve të vdekjes në Republikën e Kosovës.
Ky projekt është rezultat i bashkëpunimit ndërinstitucional mes Bashkësisë Islame të Kosovës dhe Institucioneve të vendit.
Në emër të Kryesisë së BIK-ut të pranishmit i përshëndeti sekretari i Përgjithshëm, Resul ef. Rexhepi, i cili pos tjerash tha se jetësimi praktik i këtij projekti është me rëndësi të madhe për vendin dhe në vazhdën e përpjekjeve madhore të BIK-ut për të bashkëpunuar me institucionet e shtetit, për të mirën e këtij populli.
Sekretari i Ministrisë së Punës dhe Mirëqenies Sociale, z. Izedin Bytyqi, në fjalën e tij tha se ky projekt është i një rëndësie të madhe për MMPS-në, në dy aspekte: e para ka të bëjë me menaxhimin më efikas të buxhetit, dhe e dyta ka të bëj me lehtësimin e procedurave për qytetarët.
Drejtori i Agjencionit të Regjistrimit Civil, Lulzim Ejupi, falënderoi BI-në të Kosovës si partner kyç në realizimin e këtij projekti, dhe tha se po kryehen shërbime që parandalojnë keqpërdorimet në të ardhmen, dhe ky projekt që ka filluar të implementohet me BIK-un do të vazhdojë edhe me bashkësitë tjera fetare.
Drejtori i Agjencionit të Shoqërisë së Informacionit, z. Kujtim Gashi, në fjalën e tij theksoi konsideratën dhe mirënjohjen për BI-në të Kosovës, që është pjesë e këtij projekti, dhe përmendi ofrimin e shërbimeve më të mira për komunitetin mysliman në Kosovë, duke i shfrytëzuar të arriturat e teknologjisë. Ai shprehu bindjen se edhe në të ardhme do të ketë projekte të përbashkëta me BI-në të Kosovës, dhe përgëzoi për këtë projekt. “Ky është vetëm fillimi i shfrytëzimit të resurseve të teknologjisë”, tha ndër të tjera Gashi.
Prezantimin e projektit para medieve dhe të pranishmëve e bëri inxhinieri i ARC-së Zenel Hisenaj, i cili njëherazi ka qenë i angazhuar që nga fillimi në përpilimin e programit. Ai tha se frytet e para po shihen që tani, kur jemi në fazën e testimit, dhe se beson se përfitues do të jenë institucionet tjera, duke qenë se që nga sot do të fillojë së implementuari ky projekt.
