Në Lukas Feichtner Galerie, një nga hapësirat më të njohura të artit bashkëkohor në Vjenë, u hap ekspozita personale “In Between” e artistes kosovare Albana Ejupi.
Në hapjen e ekspozitës morën pjesë i ngarkuari me punë në Ambasadën e Republikës së Kosovës në Austri, Albinot Bimbashi, ambasadori i Republikës së Shqipërisë në Austri, Fate Velaj, si dhe sekretarja e dytë e Ambasadës, Marigonë Vrajolli, të cilët shprehën përkrahjen e tyre për artisten dhe krijimtarinë e saj.
Në këtë ekspozitë, Ejupi ndërthur pikturën dhe skulpturën në një dialog të veçantë mes materialitetit dhe trupit, duke përdorur rërën e sjellë nga Kosova si element qendror të veprave të saj — simbol i kujtesës, origjinës dhe transformimit. Sipas artistes, seria “In Between” jeton në hapësirën mes pikturës dhe skulpturës, imazhit dhe objektit, vetes dhe tjetrit.
Albana Ejupi, e cila aktualisht po ndjek studimet e doktoraturës në Akademinë e Arteve të Bukura në Vjenë, po afirmohet si një prej zërave të rëndësishëm të artit bashkëkohor kosovar në diasporë.
Ky aktivitet, siç vlerëson Ambasada e Kosovës në Austri, është një dëshmi e angazhimit për të promovuar artistët kosovarë jashtë vendit dhe për të forcuar prezencën kulturore të Kosovës në skenën ndërkombëtare të artit.
