Instituti i Krimeve të Kryera Gjatë Luftës në Kosovë, ka njoftuar se po vazhdojnë të mbledhin dhe ruajnë, dëshmi autentike mbi krimet e luftës në Kosovë.
Siç ka njoftuar ky Institut, fotoreporteri Ridvan Slivova ka dorëzuar materiale dokumentuese, që përbëjnë dëshmi të çmuara që dokumentojnë krimet e kryera gjatë luftës në Kosovë.
Përveç tij, Shefki Mexhuani, ish-Drejtor Ekzekutiv i Fondit “Vendlindja Thërret”, me vendqëndrim në SHBA, ka nënshkruar procesverbalin për dorëzim-pranim të materialeve arkivore që dokumentojnë krimet e kryera gjatë luftës në Kosovë dhe sigurojnë ruajtjen e dëshmive të rëndësishme për gjeneratat e ardhshme.
“Në kuadër të këtij angazhimi, Gani Vila, drejtor i televizionit Albanian TV of America në SHBA, nënshkroi procesverbalin për dorëzim-pranim të materialeve mediatike, të cilat kontribuojnë në dokumentimin e krimeve të luftës dhe në ruajtjen e informacionit historik për brezat e ardhshëm”, thuhet në njoftim.
Ndër të tjera theksohet se stafi i IKKL-së zhvilloi gjithashtu një takim me gazetaren Ilire Zajmi, e cila u njoh nga afër me punën e Institutit, vizitoi arkivin dhe përgëzoi stafin për kontributin e vazhdueshëm, duke shprehur gatishmërinë për t’i dorëzuar Institutit materialet e saj dokumentare që pasqyrojnë krimet e luftës.
Po ashtu, Selatin Novosella priti stafin e IKKL-së në Shoqatën e të Burgosurve Politikë në Prishtinë, ku i dhuroi Institutit pesë libra dhe nënshkroi procesverbalin e bashkëpunimit duke shprehur vullnet dhe gatishmëri për bashkëpunim të mëtejmë dhe për dorëzim të dokumenteve që dëshmojnë torturat, burgosjet dhe persekutimin e shqiptarëve nga represioni serb që nga viti 1945.
Ndërkohë, Fadil Curri, publicist dhe aktivist, së bashku me Sadullah Krasniqin nga Komuna e Obiliqit, vizituan Institutin dhe dorëzuan botime librash që pasqyrojnë represionin e regjimit serb ndaj popullatës civile, duke kontribuuar në dokumentimin e luftës dhe ruajtjen e kujtesës historike.
IKKL-ja ka shprehur mirënjohje për secilin kontribuues dhe fton të gjithë qytetarët që posedojnë dokumente, fotografi apo dëshmi nga periudha e luftës t’i dorëzojnë në Institut, sepse çdo material i ruajtur është një hap më afër së vërtetës, drejtësisë dhe pasuron kujtesën kolektive. /Lajmi.net/
Njoftimi i plotë:
