Një i moshuar humbi jetën si pasojë e shpërthimit të një bombole gazi në katin e 5-të të një pallati në lagjen “Ahmet Haxhija” të Shkodrës.
Ngjarja e rëndë që ndodhi mbrëmjen e së dielës rreth orës 19:20 ka vënë në alarm policinë dhe zjarrfikësen e Shkodrës, të cilat kanë arritur të nxjerrin nga banesa Ismet Abdurrahmanin 70 vjeç.
Fillimisht u mendua se ai ishte i gjallë, por pas nxjerrjes së trupit nga pallati u konstatua se i moshuari nuk kishte më shenja jete, raporton oranews.
Burime nga vendi i ngjarjes thanë se shpërthimi i bombolës ka shkaktuar zjarr dhe dëme të mëdha materiale në dy apartamentet e katit të pestë.
Në njoftimin e policisë thuhet se 70-vjeçari ka gjetur vdekjen si pasojë e zjarrit dhe tymit.
Shërbimet zjarrfikëse kanë vënë në kontroll flakët si dhe kanë nxjerrë trupin e 70-vjeçarit duke e çuar në morgun e spitalit të Shkodrës.
Policia tha se efektivët e rendit kanë evakuuar banorët me qëllim shmangien e lëndimit apo asfiksimit të tyre nga tymi.
Ndërkohë në vendngjarje mbërriti grupi hetimor, i cili nisi punën për sqarimin e shkakut të rënies së zjarrit.
