Mediat ruse kanë raportuar se në Kremlin është duke u zhvilluar një takim mes emisarit amerikan Steve Witkoff dhe presidentit rus Vladimir Putin.
Witkoff ka mbërritur në Moskë të mërkurën, ndërsa afati i vendosur nga Donald Trump për arritjen e një armëpushimi në Ukrainë po afrohet.
Kujtojmë se presidenti amerikan ka paralajmëruar se Rusia mund të përballet me sanksione të rënda, ose me sanksione dytësore kundër të gjitha vendeve që bëjnë tregti me të, nëse nuk merr hapa drejt përfundimit të “luftës së tmerrshme” me Ukrainën.
Ndërkohë, presidenti ukrainas Volodymyr Zelensky ka paralajmëruar se Rusia do të bëjë lëvizje serioze drejt paqes vetëm nëse i mbarojnë paratë. Ai e ka mirëpritur kërcënimin e Shteteve të Bashkuara për sanksione më të ashpra dhe tarifa mbi vendet që blejnë naftë ruse.
BBC shkruan se pritshmëritë për një marrëveshje deri të premten mbeten të ulëta, ndërsa Rusia vazhdon sulmet ajrore në shkallë të gjerë ndaj Ukrainës, pavarësisht kërcënimeve të Trumpit për sanksione.
Rikujtojmë se tre raunde bisedimesh midis Ukrainës dhe Rusisë në Stamboll nuk kanë arritur të sjellin paqe as tre vjet e gjysmë pas nisjes së pushtimit të plotë nga Moska.
