Pesë vjet ishte në krye të diplomacisë kosovare e gjatë mandatit të tij, rreth 70 shtete e njohën Pavarësinë e Kosovës.
Ish-kryediplomati Enver Hoxhaj është i pakënaqur me punën e Donika Gërvallës, e cila në këtë pozitë erdhi disa vite më vonë.
Që nga ardhja në pushtet e Albin Kurtit dhe emërimit të Gërvallës në krye të diplomacisë, Hoxhaj thotë se Republika e Kosovës nuk ka pasur fare politikë të jashtme, raporton Kiks Kosova.
Momentalisht, ai pohon se diplomacia kosovare ka rënë në nadir nga injorimin që thotë se i është bërë nga Qeveria Kurti.
Ish-kryediplomati vlerëson se gjatë 2025-ës, po sikur të shfrytëzonte momentumin, Kosova ka mundur të arrinte edhe njohjen e 7 vendeve.
Injorimi i mundësive për njohje të reja, e mosanëtarësimi i shtetit të Kosovës në organizata të rëndësishme ndërkombëtare, Hoxhaj pohon se janë dështimet më të mëdha që ka pësuar politika e jashtme e Kosovës gjatë viteve të fundit.
Vetë emërimin e Gërvallës në krye të diplomacisë, Hoxhaj e cilëson si kryegafë të kësaj qeverie. E përgjegjës pohon se është kryeministri në detyrë Albin Kurti për të cilin thotë se e ka larguar politikën e jashtme nga lista e prioriteteve, duke e kthyer në një çështje të brendshme.
Mangësia e diplomacisë kosovare ai thotë se nis nga mungesa e stafit në ambasada, e pastaj edhe nga mungesa e ambasadave në disa vende.
E kjo, sipas tij, shpërfaq paaftësinë e kryediplomates në detyrë për të kuptuar rolin e diplomatëve dhe konsujve.
Hoxhaj paralajmëron se vitii 2026 do të jetë viti më i vështirë në politikën e jashtme, prandaj thotë se është detyrë e qeverisë së ardshme që ta rikthejë diplomacinë në mesin e çështjeve primare.
