Organizata e Veteranëve të Luftës së Ushtrisë Çlirimtare të Kosovës – dega në Deçan, ka njoftuar se të dielën, më 31 gusht 2025, do të mbahen homazhe përkujtimore për Heroin e Kombit, Bahri Fazliu, një nga figurat më të shquara të rezistencës kombëtare dhe simbol i sakrificës për liri.
Homazhet do të zhvillohen në Qafë Bogiqe, në Trekëndëshin kufitar Shqipëri–Kosovë–Mal i Zi, duke filluar nga ora 11:00.
“Ky përkujtim është një moment i rëndësishëm për të kujtuar me respekt të thellë veprën dhe idealin e Bahri Fazliut, i cili së bashku me shokët e tij u bë pjesë e përjetshme e lavdisë sonë kombëtare,” thuhet në njoftimin e OVL të UÇK-së – Deçan.
Organizatorët theksojnë se pjesëmarrja në këtë aktivitet përfaqëson një nderim për gjakun e Dëshmorëve, për luftën e drejtë të UÇK-së dhe është një dëshmi e përkushtimit për të mbajtur gjallë kujtimin dhe amanetin e tyre për liri dhe bashkim.
Në thirrjen e tyre drejtuar familjeve të dëshmorëve, invalidëve dhe veteranëve të luftës, si dhe qytetarëve, ata shprehin mirënjohje dhe respekt të veçantë për të gjithë ata që do të marrin pjesë në këtë ngjarje përkujtimore.
