Skenderaj, 8 korrik 2025 – Kryetari i Komunës së Skenderajt, Fadil Nura, ka reaguar pas shpërthimit të zjarreve masive që kanë përfshirë malet në territorin e kësaj komune, duke vlerësuar lartë angazhimin dhe guximin e zjarrfikësve vendorë, shkruan Drenica Press.
Në një prononcim publik, Nura tha se përballë flakëve që po kërcënojnë natyrën dhe banorët, qëndrojnë me heroizëm burrat e Shërbimit të Zjarrfikësve, të cilët po bëjnë të pamundurën për të mbajtur situatën nën kontroll, shpesh duke rrezikuar jetën e tyre.
“Kjo është gjendja aktuale në malet e territorit të komunës sonë, ku përballë flakës së zjarreve masive është heroizmi i pashoq i burrave të guximshëm të Shërbimit të Zjarrfikësve, që po bëjnë të pamundurën për të mbajtur nën kontroll, dhe kështu po rrezikojnë vetvetën për ne të tjerët. Këtyre, hallall u qoftë!”, u shpreh Nura.
Ai gjithashtu bëri thirrje për kujdes të shtuar nga ana e qytetarëve, duke kërkuar ndërgjegjësim dhe respekt për natyrën.
“Kurse ne të jemi më të kujdesshëm me natyrën!”, theksoi kreu i komunës.
Zjarret që kanë shpërthyer gjatë këtyre ditëve kanë alarmuar autoritetet lokale, ndërkohë që ekipet e emergjencës janë në terren duke bërë përpjekje të vazhdueshme për parandalimin e përhapjes së mëtejshme të flakëve./DRENICAPRESS/
