Këshilli i Rinisë Evropiane të Kosovës (KREK) sot ka mbajtur takimin e rregullt të Senatit ku ka vlerësuar se institucionet e Kosovës po i diskriminojnë të rinjtë përmes konkurseve publike për vende të ndryshme të punës që po shpallen.
Presidenti i KREK-ut, Avdullah Hasani është shprehur se e pothuajse çdo konkurs që shpallet nga institucionet publike dhe ato private kërkohet nga aplikuesit të kenë së paku një vit përvojë pune dhe kritere të tjera diskriminuese.
Këto kritere vlejnë si për të sapodiplomuarit, por edhe ata të rinj që nuk e kanë asnjë ditë përvojë pune.
“Të rinjtë në Kosovë ndihen të diskriminuar që në start të fillimit të karrierës se tyre profesionale, për shkak se konkurset për vende pune kërkojnë se paku një vit përvojë pune. Përderisa në anën tjetër, nuk u jepet mundësia që ta krijojnë këtë përvojë”, ka deklaruar Hasani.
Kreu i KREK-ut po ashtu kërkoi nga Qeveria e Kosovës nëpërmjet Ministrisë së Administratës Publike që të ndal këtë lloj diskriminimi për të rinjtë dhe konkurse publike të jenë jo diskriminuese.
“Tu jepet hapësirë të rinjve të fillojnë dhe të ndërtojnë karrierën e tyre profesionale, e jo t’i vihen këto lloj bllokadash ligjore që e pamundësojnë zhvillimin dhe inkuadrimin e të rinjve në jetën publike dhe administrative në Kosovës”, ka potencuar Hasani.
