Kryetari i Partisë Demokratike të Kosovës (PDK), Bedri Hamza, ka pritur në takim ambasadorin e ri të Gjermanisë në Kosovë, Rainer Rudolph, të cilit i uroi mirëseardhje dhe sukses në detyrën e re diplomatike.
Hamza e njoftoi ambasadorin Rudolph për përgatitjet që po bëhen në vend për zgjedhjet e ardhshme, duke theksuar gatishmërinë e tij për formimin e institucioneve të reja në afatin më të shkurtër të mundshëm, transmeton lajmi.net.
Gjatë takimit, Hamza ka theksuar pritjet e Kosovës nga partnerët ndërkombëtarë, duke përfshirë heqjen e sanksioneve të Bashkimit Evropian ndaj vendit, mbështetjen për anëtarësimin në Këshillin e Evropës dhe avancimin drejt marrjes së statusit të vendit kandidat për BE.
Ai theksoi se orientimi i Kosovës mbetet i pandryshueshëm: “Kosova ka vetëm një drejtim përpara – rrugën euroatlantike”, u shpreh Hamza.
Postimi i plotë:
Ambasadorit të ri gjerman, Rainer Rudolph, i urova mirëseardhje në Kosovë dhe e njoftova për përgatitjet për zgjedhjet e ardhshme, si dhe për gatishmërinë time për t’i formuar institucionet e reja sa më shpejt.
Në takimin tonë theksova se nga partnerët ndërkombëtarë presim përkrahje në skenën ndërkombëtare, me heqjen e sanksioneve të BE-së, mbështetjen për anëtarësimin në Këshillin e Evropës dhe marrjen e statusit të vendit kandidat për BE.
Kosova ka vetëm një drejtim përpara: rrugën euroatlantike./lajmi.net/
