Një numër biznesesh pranuan të hyjnë me investime në Parkun e Biznesit në Drenas, por muajve të fundit qëndrimi aty ka nisur t’u sjellë probleme goxha të mëdha.
Nuk kanë energji të sigurt, ujë e disa kushte tjera të cilat thonë se ua garantoi Ministria e Tregtisë dhe Industrisë në momentin e nënshkrimit të kontratave.
Sikur të mos mjaftonin vetëm këto probleme. Kompanitë kanë nisur të kenë probleme me hajnat.
Nga ana tjetër, zyrtarë të Ministrisë së Tregtisë dhe Industrisë kanë mohuar t’u kenë dhënë këso garancish në kontratat e nënshkruara.
Kjo ministri ka thënë të mos ketë ndonjë informacion në lidhje me ndërprerjet e energjisë në këtë park, por kur ka ndërprerje që i njofton KEDS-i, ata i njoftojnë bizneset.
Ndërsa, sa i përket furnizimit me ujë për bizneset në Parkun e Biznesit në Drenas kanë thënë se që nga viti 2014 është përgjegjësi e Ujësjellësit të Prishtinës.
