Njohësi i arsimit, Dukagjin Popovci përmes një postimi në llogarinë e tij në facebook ka analizuar arsimimin e femrës në Kosovë, që nga viti 1975 e deri më sot.
Kështu, sipas Popovcit në vitin 1975 në arsimin e lartë të Kosovës vetëm 23.5% ishin femra, ndërsa në vitin 2015 femrat përbëjnë 50.2% të studentëve, pra shumicën.
Më poshtë mund ta lexoni të plotë postimin:
Në vitin 1975 në arsimin e lartë të Kosovës vetëm 23.5% ishin femra, ndërsa në vitin 2015 femrat përbëjnë 50.2% të studentëve, pra shumicën. Të gjitha analizat tregojnë se femrat janë më të përkushtuara në studime sesa meshkujt – 38.8% e femrave diplomojnë me kohë krahasuar me 29% të meshkujve. Pa dyshim, kjo flet për avancim domethënës në emancipimin e gruas. Tani, rreth e punësimit. Në vitin 1975, vetëm 20% e të punësuarve në Kosovë ishin femra, kurse 40 vjet më vonë, në vitin 2015 – vetëm 22.6%. Rreth 55% e grave që kanë zgjedhur të mos kërkojnë punë deklarojnë se pengohen nga obligimet familjare ose e kanë humbur shpresën se do të punësohen. Kjo flet se procesi i emancipimit të burrave është ende duke u zhvilluar, edhe atë me hapa të ngadalshëm.
