Futbolli i Kosovës në zi, ndahet nga jeta legjenda Erdogan Celina

Ka ndërruar jetë pas një sëmundjeje të shkurtër Erdogan Celina, një prej figurave më të njohura dhe më të respektuara të futbollit kosovar, pjesëtar i gjeneratës së artë që la gjurmë të thella në historinë e këtij sporti.

Lajmin për ndarjen e tij nga jeta e ka bërë të ditur presidenti i Federatës së Futbollit të Kosovës, Agim Ademi, i cili përmes një mesazhi ngushëllimi e përshkroi Celinën si futbollist ikonë, lider dhe personalitet të jashtëzakonshëm.

Pjesë e gjeneratës së artë

Erdogan Celina ishte pjesë e Prishtinës dhe Trepçës në një prej periudhave më të rëndësishme të futbollit kosovar.

Me Trepçën, ai ishte pjesë e skuadrës që arriti deri në finalen e Kupës së Jugosllavisë në vitin 1978, një nga sukseset më të mëdha të një klubi nga Kosova në atë periudhë.

Gjatë karrierës së tij, Celina u dallua jo vetëm për cilësitë si futbollist, por edhe për personalitetin, autoritetin dhe rolin e tij si kapiten e lider në fushë.

“Erdogani i përkiste brezit të artë të futbollit të Kosovës, një gjenerate që me talentin, karakterin dhe dashurinë për futbollin ndërtoi kapituj të rëndësishëm të historisë së këtij sporti”, shkroi Agim Ademi.

Kontributi vazhdoi edhe si trajner

Pas përfundimit të karrierës si futbollist, Celina nuk u nda nga futbolli.

Ai vazhdoi të japë kontribut si trajner, duke drejtuar ndër të tjera Lirinë e Prizrenit, ndërsa ishte i angazhuar edhe me ekipin kombëtar U21 të Kosovës.