Naim Bazaj, anëtar i PDK-së dhe kryesues i Kuvendit Komunal të Drenasit, po akuzohet se ai e ka organizuar sulmin me gurë ndaj kreytart të Drenasit Ramiz Lladrovci, mbrëmë në fshatin Tërstenik.
Bazaj mohoi të ketë pasur ndonjë sulm siç ka thënë Lladrovci në Polici, por tha se banorët janë mbledhur në rrugë për të pyetur Lladrovcin për disa deklarata të tij, të thëna gjatë fushatës në fshatin Tërstenik, njëherit vendlindja e Bazajt, shkruan Periskopi.
Ai ka thënë se Lladrovci ka deklaruar në tre vende në Tërstenik se ata që nuk janë me të “duhet të kërkojnë azil dhe se nuk kanë vend këtu”, kështu që, sipas tij, banorët kanë dalë të kërkojnë llogari nga Lladrovci për deklaratat.
Ai tha se k shkuar në vendngjarje, duke mohuar se ka ndodhur ndonjë sulm me gurë ndaj Lladrovcit, siç e ka bërë padinë në Polici Lladrovci.
Madje, Bazaj thotë se ky ka qenë edhe mashtrim i Policisë.
“Unë e kam pa një tollovi dhe kam shku aty, por nuk ka qenë sulm siç e ka ekzagjëruar ai. Ka qenë mashtrim edhe i Policisë. Nuk është e vërtetë… unë nuk e di që është hedhur ndonjë guri në drejtim të makinave të ekipit të zotit Lladrovci”, ka thënë ai. /Periskopi/
